ಬಂದಾರು : ನೇತ್ರಾವತಿ ನದಿಯಲ್ಲಿ ಮೊಸಳೆ ಪತ್ತೆ

Dhwani News
November 9, 2025

ಬಂದಾರು : ನೇತ್ರಾವತಿ ನದಿಯಲ್ಲಿ ಶನಿವಾರ ಮೊಸಳೆ ಕಂಡು ಬಂದಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ನದಿ ಬದಿ ಹೋದವರಿಗೆ ನದಿಯ ಮಧ್ಯೆ ಮೊಸಳೆ ಈಜಾಡುವುದು ಗಮನಕ್ಕೆ ಬಂದಿದೆ ಎನ್ನಲಾಗಿದೆ.

ನೇತ್ರಾವತಿ ನದಿ ಹರಿಯುವ ಹಲವು ಪ್ರದೇಶಗಳಲ್ಲಿ ಮೊಸಳೆ ತಿರುಗಾಟ ಕಂಡುಬಂದಿರುವುದು ಆತಂಕಕ್ಕೆ ಕಾರಣವಾಗಿದೆ. ಮುಂಡಾಜೆ, ಕಲ್ಮಂಜ, ಮೊಗ್ರು ಮೊದಲಾದ ಕಡೆಗಳಲ್ಲಿ ನೇತ್ರಾವತಿ ನದಿ ಹರಿದು ಬರುತ್ತಿದ್ದು ಈ ಭಾಗದ ಅಲ್ಲಲ್ಲಿ ಮೊಸಳೆಗಳು ಗೋಚರಿಸುತ್ತಿವೆ. ಇದರಿಂದ ಜನರು ನದಿಯತ್ತ ಹೋಗಲು ಭಯಪಡುವ ಸ್ಥಿತಿ ಎದುರಾಗಿದೆ. ಮುಂದಿನ ಕೆಲವೇ ದಿನಗಳಲ್ಲಿ ಈ ನದಿಯ ಹಲವೆಡೆ ಕಿಂಡಿ ಅಣೆಕಟ್ಟುಗಳಿಗೆ ಹಲಗೆ ಹಾಕಬೇಕಿದ್ದು, ಮೊಸಳೆ ಅಲ್ಲಲ್ಲಿ ಇರುವ ಕಾರಣ ಕಾರ್ಮಿಕರು ನದಿಯತ್ತ ತೆರಳಲು ಹಿಂಜರಿಯುವಂತಾಗಿದೆ.