ಬೆಂಗಳೂರು, ಜೂ. 29 : ಭಾರತೀಯ ಚುನಾವಣಾ ಆಯೋಗದಿಂದ ಮತದಾರರ ಪಟ್ಟಿಯನ್ನು ಪರಿಷ್ಕರಿಸಲು ಹಾಗೂ ನಕಲಿ ಮತದಾರರಿಗೆ ಬ್ರೇಕ್ ಹಾಕಲು ಎಸ್ ಐಆರ್ ಪ್ರಕ್ರಿಯೆ ಆರಂಭಿಸುತ್ತಿದೆ. ಆಗಷ್ಟ್ 5 ರಂದು ಮತದಾರರ ಕರಡು ಪಟ್ಟಿ ಪ್ರಕಟ ಆಗಲಿದ್ದು, ಅಕ್ಟೋಬರ್ 7 ಕ್ಕೆ ಎಲ್ಲಾ ಆಕ್ಷೇಪಣೆಗಳ ಇತ್ಯರ್ಥದ ಬಳಿಕ ಅಧಿಕೃತ ಅಂತಿಮ ಮತದಾರರ ಪಟ್ಟಿ ಪ್ರಕಟ ಆಗಲಿದೆ. ಕರ್ನಾಟಕ ಸೇರಿ ಒಟ್ಟು 16 ರಾಜ್ಯಗಳಲ್ಲಿ, 3 ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಇದು ಆರಂಭವಾಗಲಿದೆ.
ರಾಜ್ಯದಲ್ಲಿ 2002ರಲ್ಲಿ ನಡೆದಿದ್ದ ಮತದಾರರ ಪಟ್ಟಿ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್ಐಆರ್)ಯ ದಾಖಲೆಗಳನ್ನು ಈಗಿನ ಎಸ್ಐಆರ್ನಲ್ಲಿ ಉಲ್ಲೇಖವಾಗಿ ಪರಿಗಣಿಸಲಾಗುತ್ತಿದೆ. 2008ರ ಕ್ಷೇತ್ರ ಪುನರ್ ವಿಂಗಡಣೆಗೆ ಒಳಗಾದ ಸಾವಿರಾರು ಮತದಾರರಿಗೆ ತಮ್ಮ 23 ವರ್ಷ ಹಳೆಯ ಮಾಹಿತಿ ಹುಡುಕುವ ಸವಾಲು ಎದುರಿದೆ.
ರಾಜ್ಯದಲ್ಲಿ ಜೂ.30ರಿಂದ ಎಲ್ಲ ಮತದಾರರಿಗೂ ಎನ್ಯುಮರೇಷನ್ ಅರ್ಜಿ ವಿತರಣೆ ಆರಂಭವಾಗುತ್ತಿದೆ. ಮತಗಟ್ಟೆ ಅಧಿಕಾರಿಗಳೇ ಮನೆಗೆ ಬಂದು ಅರ್ಜಿ ಕೊಡುತ್ತಾರೆ. ಆ ಎನ್ಯುಮರೇಷನ್ ಅರ್ಜಿಯಲ್ಲಿ ಮತದಾರರು 2002ರಲ್ಲಿ ನಡೆದ ಎಸ್ಐಆರ್ ವೇಳೆಯ ಗುರುತಿನ ಚೀಟಿಯ ಮಾಹಿತಿ ಭರ್ತಿ ಮಾಡಬೇಕು. ಆ ಸಂದರ್ಭದಲ್ಲಿ 18 ವರ್ಷ ಆಗಿರದೇ ಇದ್ದವರು ಈಗ ಎನ್ಯುಮರೇಷನ್ ಅರ್ಜಿಯಲ್ಲಿ ತಮ್ಮ ತಂದೆಯ 2002ರ ಅವಧಿಯ ಗುರುತಿನ ಚೀಟಿಯ ಮಾಹಿತಿ ತುಂಬಬೇಕು. ತಂದೆ ಇಲ್ಲದೇ ಇದ್ದರೆ ಅಜ್ಜನ ಮಾಹಿತಿ.
ಕ್ಷೇತ್ರಗಳಲ್ಲಿ ಬದಲಾವಣೆ:
ಆದರೆ, ರಾಜ್ಯದಲ್ಲಿ 2008ರಲ್ಲಿ ವಿಧಾನಸಭಾ ಮತಕ್ಷೇತ್ರಗಳ ಪುನರ್ ವಿಂಗಡಣೆ ಆಗಿದೆ. ವಿಧಾನಸಭಾ ಕ್ಷೇತ್ರಗಳ ಸಂಖ್ಯೆ ಈಗಿದ್ದಷ್ಟೇ (224) ಇದ್ದರೂ ಕ್ಷೇತ್ರಗಳ ಗಡಿ ಬದಲಾಗಿವೆ. ಕೆಲ ಕ್ಷೇತ್ರಗಳು ಪಕ್ಕದ ಕ್ಷೇತ್ರದೊಂದಿಗೆ ವಿಲೀನವಾದರೆ, ಇನ್ನೂ ಕೆಲ ಕ್ಷೇತ್ರಗಳು ಮೀಸಲು ಹೆಸರಿನಲ್ಲಿ ಹೊಸದಾಗಿ ರಚನೆ ಆಗಿವೆ. ಉತ್ತರ ಕನ್ನಡ ಜಿಲ್ಲೆಯಲ್ಲಿ ಎಲ್ಲ ವಿಧಾನಸಭಾ ಕ್ಷೇತ್ರಗಳ ತಾಲೂಕುಗಳೇ ಬದಲಾಗಿವೆ. ಕಾರವಾರ- ಜೋಯಿಡಾ ತಾಲೂಕು ಸೇರಿ ಇದ್ದ ವಿಧಾನಸಭಾ ಕ್ಷೇತ್ರ 2008ರಲ್ಲಿಕಾರವಾರ- ಅಂಕೋಲಾ ತಾಲೂಕು ಸೇರಿ ಆಗಿದೆ. ಹೀಗೆ ರಾಜ್ಯಾದ್ಯಂತ ಕ್ಷೇತ್ರಗಳ ಗಡಿ ಆಚೀಚೆ ಆಗಿ ಮತದಾರರ ಮತಗಟ್ಟೆ ಸಂಖ್ಯೆಯಲ್ಲೂ ವ್ಯತ್ಯಾಸ ಆಗಿವೆ. ಎಸ್ಐಆರ್ಗಾಗಿ 23 ವರ್ಷಗಳ ಹಳೆಯ ಮತಗಟ್ಟೆ, ವಿಧಾನಸಭಾ ಕ್ಷೇತ್ರದ ಸಂಖ್ಯೆ ಎಲ್ಲವನ್ನೂ ಪತ್ತೆ ಮಾಡಿ ಎನ್ಯುಮರೇಷನ್ನಲ್ಲಿ ತುಂಬಬೇಕು. ಆ ಮಾಹಿತಿ ಪತ್ತೆ ಮಾಡುವುದೇ ಮಹತ್ವದ ಕೆಲಸ. ಅದಕ್ಕಾಗಿ ಚುನಾವಣಾ ಆಯೋಗ 2002ರ ಮತದಾರರ ಪಟ್ಟಿಯನ್ನು ಆಯೋಗದ ಆನ್ಲೈನ್ನಲ್ಲಿ ಪ್ರಕಟಿಸಿದೆ. ಮಾಹಿತಿ ಪತ್ತೆ ಮಾಡಲು ಬಿಎಲ್ಒಗಳಿಗೂ ತರಬೇತಿ ನೀಡಲಾಗಿದೆ. ತಿಳಿವಳಿಕೆ ಇಲ್ಲದೇ ಇರುವವರಿಗೆ ಇದು ಸಮಸ್ಯೆ ಆಗಬಹುದು ಎನ್ನುವ ಆತಂಕ ಇದೆ.
ಎನ್ಯುಮರೇಷನ್ ಕಡ್ಡಾಯ
ಎಸ್ಐಆರ್ ಸಲುವಾಗಿ 2002ರ ಮತದಾರರ ಪಟ್ಟಿ ಮತ್ತು ಈಗಿನ ಮತದಾರರ ಪಟ್ಟಿ ಮ್ಯಾಪಿಂಗ್ ಮಾಡಲಾಗಿದೆ. ಎಸ್ಐಆರ್ನಲ್ಲಿ ಎಲ್ಲ ಮತದಾರರು ಕಡ್ಡಾಯವಾಗಿ ಎನ್ಯುಮರೇಷನ್ ಅರ್ಜಿ ಭರ್ತಿ ಮಾಡಬೇಕು. ಅರ್ಜಿಯಲ್ಲಿ ಮತದಾರರ ಗುರುತಿನ ಚೀಟಿಯ ಮಾಹಿತಿಯಾದ ವಿಧಾನಸಭಾ ಕ್ಷೇತ್ರ ಸಂಖ್ಯೆ, ಮತಗಟ್ಟೆ ಸಂಖ್ಯೆ ಮತ್ತು ಕ್ರಮ ಸಂಖ್ಯೆ ನಮೂದಿಸಬೇಕು. ಅದೇ ಮತದಾರರ ಅಸ್ತಿತ್ವ ನಿರ್ಧರಿಸಲಿದೆ. ಅದೇ ಎನ್ಯುಮರೇಷನ್ ಅರ್ಜಿಯಲ್ಲಿ ಉಲ್ಲೇಖವಾಗಿ 2002ರಲ್ಲಿ ಎಸ್ಐಆರ್ ಆದಾಗ ಇದ್ದ ಮತಗಟ್ಟೆ, ಗುರುತಿನ ಚೀಟಿ ಮಾಹಿತಿ ಭರ್ತಿ ಮಾಡಬೇಕು. ಈ ಅರ್ಜಿಯನ್ನು ಭರ್ತಿ ಮಾಡಿದ ನಂತರ ಒಂದು ಪ್ರತಿಯನ್ನು ಬಿಎಲ್ಒಗಳಿಗೆ ಹಿಂತಿರುಗಿಸಬೇಕು. ಹಿಂತಿರುಗಿಸದೇ ಇದ್ದರೆ ಮತದಾರರ ಪಟ್ಟಿಯಿಂದ ಹೆಸರು ಅಳಿಸಿ ಹೋಗಲಿದೆ.
ತಪ್ಪಾದರೆ ಏನಾಗುತ್ತದೆ?
ಎನ್ಯುಮರೇಷನ್ ಅರ್ಜಿಯಲ್ಲಿ 2002ರ ಎಸ್ಐಆರ್ ಮತದಾರರ ಚೀಟಿಯ ಮಾಹಿತಿ ತಪ್ಪಾಗಿ ನಮೂದಿಸಿದರೆ ಮ್ಯಾಪಿಂಗ್ ತಪ್ಪಾಗುತ್ತದೆ. ಮತದಾರರ ಹೆಸರು ಕರಡು ಪ್ರತಿಯಲ್ಲಿ ಸೇರಿದರೂ ಅಂತಿಮ ಆಗುವುದಿಲ್ಲ. ಆಗ ತಹಸೀಲ್ದಾರ್ ಕೊಡುವ ನೋಟಿಸ್ ಹೊಸದಾಗಿ ದಾಖಲೆ ಕೊಟ್ಟುಸರಿ ಮಾಡಿಕೊಳ್ಳಬೇಕಾಗುತ್ತದೆ. 2002ರ ಎಸ್ಆರ್ ನಂತರ ಮತದಾರರ ಚೀಟಿಯ ಮಾಹಿತಿ ಪತ್ತೆ ಮಾಡುವುದು ಕಷ್ಟವಲ್ಲ. ಬಿಎಲ್ಒಗಳ ಬಳಿ ಇರುವ ಆ್ಯಪ್ನಲ್ಲಿ ಸುಲಭವಾಗಿ ಪತ್ತೆಯಾಗುತ್ತದೆ. ಎನ್ಯುಮರೇಷನ್ ಅರ್ಜಿಯಲ್ಲಿ 2002ರ ಎಸ್ಐಆರ್ ಮತದಾರರ ಚೀಟಿಯ ಮಾಹಿತಿ ಉಲ್ಲೇಖಿಸಬೇಕು. ಬಿಎಲ್ಒಗಳು ಆ ಮಾಹಿತಿ ಹುಡುಕಿ ಕೊಡುತ್ತಾರೆ. ಮತದಾರರು ಕೂಡ ಚುನಾವಣಾ ಆಯೋಗದ ವೆಬ್ಸೈಟ್ ಗೆ ಹೋಗಿ ಸುಲಭವಾಗಿ ಪತ್ತೆ ಮಾಡಬಹುದು.
