ನವದೆಹಲಿ, ಜೂ. 25 : ಕಳೆದ ಕೆಲವು ತಿಂಗಳುಗಳಿಂದ ಭಾರತೀಯ ಪೌರತ್ವದ ಮಾನದಂಡಗಳ ಕುರಿತು ದೇಶಾದ್ಯಂತ ಚರ್ಚೆ ನಡೆಯುತ್ತಿದ್ದು, “ಭಾರತೀಯ ಪೌರತ್ವವನ್ನು ಸಾಬೀತುಪಡಿಸುವ ದಾಖಲೆ ಯಾವುದು?” ಎಂಬ ಪ್ರಶ್ನೆ ಮತ್ತೆ ಮುನ್ನೆಲೆಗೆ ಬಂದಿದೆ.
ಕೇಂದ್ರ ಸರ್ಕಾರವು ಬುಧವಾರ (ಜೂನ್ 24)ನೀಡಿದ ಸ್ಪಷ್ಟಿಕರಣದಲ್ಲಿ, ಅತ್ಯಂತ ಕಠಿನ ಪರಿಶೀಲನೆ ಪ್ರಕ್ರಿಯೆಯ ಮೂಲಕ ನೀಡಲಾಗುವ ದಾಖಲೆಗಳಲ್ಲಿ ಒಂದಾದ ಪಾಸ್‌ಪೋರ್ಟ್ ಕೂಡ ಪೌರತ್ವ ಸಾಬೀತಿಗೆ ಸಾಕ್ಷಿಯಲ್ಲ ಎಂದು ತಿಳಿಸಿದೆ. ಈ ವಿಚಾರವು ಹೊಸದೇನಲ್ಲದಿದ್ದರೂ, ಮತ್ತೊಮ್ಮೆ ಸಾರ್ವಜನಿಕ ಚರ್ಚೆಗೆ ಕಾರಣವಾಗಿದೆ.
ಈ ಸ್ಪಷ್ಟಿಕರಣ ಅನೇಕರಿಗೆ ಅಚ್ಚರಿ ಮೂಡಿಸಬಹುದಾದರೂ, ಪ್ರಸ್ತುತ ಪಾಸ್‌ಪೋರ್ಟ್ ಹೊಂದಿರುವ ಸುಮಾರು ಶೇಕಡಾ 10ರಷ್ಟು ಭಾರತೀಯರಿಗೆ ಇದು ಅಚ್ಚರಿಯ ವಿಷಯವಾಗಿರಬಹುದು ಎಂಬ ಅಭಿಪ್ರಾಯಗಳು ವ್ಯಕ್ತವಾಗಿವೆ. ಪೌರತ್ವದ ದಾಖಲೆಗಳ ಕುರಿತ ಗೊಂದಲ ಮತ್ತು ಅದರ ಕಾನೂನುಬದ್ಧ ವ್ಯಾಖ್ಯಾನದ ಬಗ್ಗೆ ಚರ್ಚೆಗಳು ಮುಂದುವರಿದಿವೆ.
ಈಗಾಗಲೇ ಹಲವಾರು ನ್ಯಾಯಾಲಯಗಳು ಮತ್ತು ಸರ್ಕಾರವು ಈ ಸಮಸ್ಯೆಯನ್ನು ಇತ್ಯರ್ಥಪಡಿಸಿವೆ. ಪಾಸ್‌ಪೋರ್ಟ್ ಕೇವಲ ಪ್ರಯಾಣ ದಾಖಲೆಯಾಗಿದ್ದು ಅದು ವಿದೇಶದಲ್ಲಿ ನಿಮ್ಮ ರಾಷ್ಟ್ರೀಯತೆಯನ್ನು ರುಜುವಾತು ಪಡಿಸಲು ಸಹಾಯ ಮಾಡುತ್ತದೆ. ಇದು ಪೌರತ್ವಕ್ಕಿಂತ ಬಹಳ ಭಿನ್ನವಾಗಿದೆ. “ಪಾಸ್‌ಪೋರ್ಟ್ ಹೆಚ್ಚಾಗಿ ರಾಜ್ಯದ ಸ್ವಂತ ಪ್ರಜೆಗಳಿಗೆ ನೀಡಲಾಗುವ ಗುರುತು ಮತ್ತು ಪ್ರಯಾಣ ದಾಖಲೆಯಾಗಿದೆ” ಎಂದು ಸರ್ಕಾರದ ಪಾಸ್‌ಪೋರ್ಟ್ ಕೈಪಿಡಿಯಲ್ಲಿ ಉಲ್ಲೇಖಿಸಲಾಗಿದೆ.
ಪೌರತ್ವಕ್ಕೆ ಪಾಸ್ ಪೋರ್ಟ್ ಪುರಾವೆ ಅಲ್ಲ ಯಾಕೆ?
ಈ ಬೆಳವಣಿಗೆ ಒಂದು ಮಹತ್ವದ ಪ್ರಶ್ನೆಯನ್ನು ಹುಟ್ಟುಹಾಕಿದೆ. ಭಾರತೀಯ ನಾಗರಿಕರಿಗೆ ಮಾತ್ರ ಪಾಸ್‌ಪೋರ್ಟ್ ನೀಡಲಾಗುವುದಾದರೆ, ಅದು ಪೌರತ್ವದ ಸಾಕ್ಷಿಯಾಗಿ ಏಕೆ ಪರಿಗಣಿಸಲಾಗುವುದಿಲ್ಲ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ. ಆದರೆ, ಈ ಪ್ರಶ್ನೆಗೆ ದೊರೆಯುವ ಉತ್ತರವೇ ಇನ್ನಷ್ಟು ಆತಂಕಕಾರಿ. ಕಾರಣ, 1967ರ ಪಾಸ್‌ಪೋರ್ಟ್ ಕಾಯ್ದೆ ಪ್ರಕಾರ, ಪಾಸ್‌ಪೋರ್ಟ್ ಮತ್ತು ಪೌರತ್ವದ ನಡುವಿನ ಸಂಬಂಧವನ್ನು ಅಂತಿಮವಾಗಿ ಹಾಗೂ ಸ್ಪಷ್ಟವಾಗಿ ವ್ಯಾಖ್ಯಾನಿಸುವುದಿಲ್ಲ. ಹೀಗಾಗಿ, ಪಾಸ್‌ಪೋರ್ಟ್ ಹೊಂದಿರುವ ವ್ಯಕ್ತಿಯು ಭಾರತೀಯ ನಾಗರಿಕನೆಂಬುದನ್ನು ಅದು ಸೂಚಿಸಿದರೂ, ಕಾನೂನುಬದ್ಧವಾಗಿ ಪೌರತ್ವದ ನಿರ್ಣಾಯಕ ದಾಖಲೆ ಎಂದು ಪರಿಗಣಿಸಲಾಗುವುದಿಲ್ಲ ಎಂಬ ವಾದಗಳು ಕೇಳಿಬರುತ್ತಿವೆ. ಈ ಹಿನ್ನೆಲೆಯಲ್ಲಿ ಪೌರತ್ವದ ಸಾಕ್ಷ್ಯಗಳ ಕುರಿತು ಮತ್ತೊಮ್ಮೆ ಚರ್ಚೆ ತೀವ್ರಗೊಂಡಿದೆ.
