ಕೊಚ್ಚಿ, ಜ. 02 : ಶಬರಿಮಲೆ ಚಿನ್ನದ ಕಳ್ಳತನ ಪ್ರಕರಣದಲ್ಲಿ ಮತ್ತೊಂದು ತಿರುವು ಸಿಕ್ಕಿದ್ದು, ಕೇವಲ ಎರಡು ವಿಗ್ರಹಗಳಲ್ಲಿ ಚಿನ್ನ ಕಳವಾಗಿದ್ದಲ್ಲ ಬರೋಬ್ಬರಿ ಏಳು ತಾಮ್ರದ ತಗಡುಗಳಲ್ಲೂ ಚಿನ್ನ ನಾಪತ್ತೆಯಾಗಿದೆ ಎಂಬ ಆಘಾತಕಾರಿ ಅಂಶವನ್ನು ಎಸ್ ಐಟಿ ಬಹಿರಂಗಪಡಿಸಿದೆ.
ವಿಶೇಷ ತನಿಖಾ ತಂಡ ನ್ಯಾಯಾಲಯಕ್ಕೆ ವರದಿಯನ್ನು ಸಲ್ಲಿಸಿದ್ದು, ಆ ವರದಿಯಲ್ಲಿ ಮತ್ತಷ್ಟು ಆಘಾತಕಾರಿ ಸಂಗತಿಗಳನ್ನು ಬಹಿರಂಗವಾಗಿದೆ. ಈ ಪ್ರಕರಣವು ಕೇವಲ ಎರಡು ವಿಗ್ರಹಗಳಿಗೆ ಸೀಮಿತವಾಗಿಲ್ಲ ಎಂದು ಎಸ್ಐಟಿ ತಿಳಿಸಿದೆ. ಈ ಪ್ರಕರಣದಲ್ಲಿ ಮೂವರು ಪ್ರಮುಖ ಆರೋಪಿಗಳ ವಶಕ್ಕೆ ಪಡೆಯಲು ಎಸ್ಐಟಿ ನ್ಯಾಯಾಲಯಕ್ಕೆ ಮನವಿ ಮಾಡಿಕೊಂಡಿದೆ. ಕೇರಳ ಹೈಕೋರ್ಟ್ ಆದೇಶದ ಮೇರೆಗೆ ತನಿಖೆ ನಡೆಸುತ್ತಿರುವ ಎಸ್ಐಟಿ, ಶಬರಿಮಲೆ ದೇವಾಲಯದ ಪ್ರಭಾ ಮಂಡಲಂನಲ್ಲಿರುವ ಶಿವ ಮತ್ತು ವ್ಯಾಳಿ ರೂಪಂ ವಿಗ್ರಹಗಳನ್ನು ಒಳಗೊಂಡ ಏಳು ತಾಮ್ರದ ತಗಡುಗಳಿಂದ ಚಿನ್ನವನ್ನು ತೆಗೆಯಲಾಗಿದೆ ಎಂದು ವರದಿಯಲ್ಲಿ ತಿಳಿಸಿದೆ.
ಏಳು ತಾಮ್ರದ ತಗಡುಗಳಲ್ಲೂ ಚಿನ್ನ ನಾಪತ್ತೆ
ಈ ತಾಮ್ರದ ತಗಡುಗಳು ದೇವಾಲಯದ ಗರ್ಭಗುಡಿಯ ಮೆಟ್ಟಿಲುಗಳ (ಸೋಪಾನ) ಬಳಿ ಇವೆ. ರಾಸಾಯನಿಕ ಮಿಶ್ರಣ ಬಳಸಿ ಚಿನ್ನವನ್ನು ಬೇರ್ಪಡಿಸಲಾಗಿದೆ ಎಂದು ಎಸ್ಐಟಿ ಹೇಳಿದೆ. ಈ ಚಿನ್ನವು ಚೆನ್ನೈನ ಸ್ಮಾರ್ಟ್ ಕ್ರಿಯೇಷನ್ಸ್ನಲ್ಲಿ ಪ್ರತ್ಯೇಕಿಸಲ್ಪಟ್ಟಿದ್ದು, ಪ್ರಸ್ತುತ ಬೆಳ್ಳಾರಿಯಲ್ಲಿದ್ದ ಚಿನ್ನದ ವ್ಯಾಪಾರಿ ಗೋವರ್ಧನ್ ರೋಡ್ಡಂ ವಶದಲ್ಲಿದೆ ಎಂದು ತನಿಖಾ ತಂಡ ತಿಳಿಸಿದೆ. ಪ್ರಕರಣದ ಪ್ರಮುಖ ಆರೋಪಿಗಳಾದ ಸ್ವಯಂಘೋಷಿತ ಪ್ರಾಯೋಜಕ ಉನ್ನಿಕೃಷ್ಣನ್ ಪೊಟ್ಟಿ, ಗೋವರ್ಧನ್ ರೋಡ್ಡಂ ಮತ್ತು ಚೆನ್ನೈನ ಸ್ಮಾರ್ಟ್ ಕ್ರಿಯೇಷನ್ಸ್ನ ಪಂಕಜ್ ಭಂಡಾರಿ ಅವರನ್ನು ವಶಕ್ಕೆ ಪಡೆಯಲು ಎಸ್ಐಟಿ ನ್ಯಾಯಾಲಯಕ್ಕೆ ಮನವಿ ಮಾಡಿಕೊಂಡಿದೆ. ಈ ಮೂವರು ಸೇರಿದಂತೆ ಒಟ್ಟು ಹತ್ತು ಮಂದಿಯನ್ನು ಈವರೆಗೆ ಬಂಧಿಸಲಾಗಿದೆ. ದೇವಾಲಯದ ವಿವಿಧ ಕಲಾಕೃತಿಗಳ ಮೇಲಿನ ಚಿನ್ನದ ಲೇಪನದ ನಿಖರ ಪ್ರಮಾಣವನ್ನು ಪತ್ತೆಹಚ್ಚಲು, ಇಸ್ರೋ (ISRO) ಸಂಸ್ಥೆಯ ವಿಜ್ಞಾನಿಗಳ ತಾಂತ್ರಿಕ ಸಹಾಯವನ್ನು ಕೋರಲಾಗಿದೆ ಎಂದು ಎಸ್ಐಟಿ ವರದಿಯಲ್ಲಿ ತಿಳಿಸಿದೆ. ವಿಜ್ಞಾನಿಗಳು ಚಿನ್ನದ ಲೇಪಿತ ತಾಮ್ರದ ತಗಡುಗಳಿಂದ ಮಾದರಿಗಳನ್ನು ಸಂಗ್ರಹಿಸಲಿದ್ದಾರೆ.
ಎಸ್ಐಟಿ ಪ್ರಶ್ನೆ
ಈವರೆಗೆ ಬಂಧಿತರಾದ ಹತ್ತು ಮಂದಿಯಲ್ಲಿ ಮೂವರು ಸಿಪಿಐ(ಎಂ) ನಾಯಕರಿದ್ದಾರೆ. ಮಾಜಿ ಶಾಸಕ ಎ. ಪದ್ಮಕುಮಾರ್ ಕೂಡ ಬಂಧಿತರಲ್ಲೊಬ್ಬರು. ಕಳೆದ ವಾರ, ದೇವಾಲಯದಲ್ಲಿ ಈ ಅಕ್ರಮಗಳು ನಡೆದಿದ್ದ 2019 ರಲ್ಲಿ ದೇವಸ್ವಂ ಸಚಿವರಾಗಿದ್ದ ಮಾಜಿ ಸಚಿವ ಕಡಕಂಪಲ್ಲಿ ಸುರೇಂದ್ರನ್ ಅವರನ್ನು ಎಸ್ಐಟಿ ಪ್ರಶ್ನಿಸಿದೆ. ಅಕ್ಟೋಬರ್ನಲ್ಲಿ ಕೇರಳ ಹೈಕೋರ್ಟ್ ದೇವಾಲಯದ ಅಮೂಲ್ಯ ವಸ್ತುಗಳು ಮತ್ತು ಚಿನ್ನದ ದುರುಪಯೋಗದ ಬಗ್ಗೆ ವ್ಯಾಪಕ ತನಿಖೆಗೆ ಆದೇಶಿಸಿದ ನಂತರ ಸಬರಿಮಲ ದೇವಾಲಯವು ಸುದ್ದಿಯಲ್ಲಿತ್ತು. ನ್ಯಾಯಾಲಯವು ದೇವಾಲಯದ ಅಮೂಲ್ಯ ವಸ್ತುಗಳ ಪಟ್ಟಿಯನ್ನು ತಯಾರಿಸಲು ಮಾಜಿ ನ್ಯಾಯಾಧೀಶ ಕೆ.ಟಿ. ಶಂಕರನ್ ಅವರನ್ನು ನೇಮಿಸಿತ್ತು. ದೇವಾಲಯದ ವಿಜಿಲೆನ್ಸ್ ಅಧಿಕಾರಿಗೆ ಎಲ್ಲಾ ಅಕ್ರಮಗಳ ಬಗ್ಗೆ ತನಿಖೆ ನಡೆಸಲು ನಿರ್ದೇಶನ ನೀಡಿತ್ತು. ವಿಜಿಲೆನ್ಸ್ ಅಧಿಕಾರಿಯ ಪ್ರಾಥಮಿಕ ವರದಿಯ ಪ್ರಕಾರ, ದೇವಾಲಯದ ಗರ್ಭಗುಡಿಯ ದ್ವಾರಪಾಲಕ ವಿಗ್ರಹಗಳ ಚಿನ್ನದ ಲೇಪವನ್ನು ನ್ಯಾಯಾಲಯಕ್ಕೆ ತಿಳಿಸದೆ ತೆಗೆದುಹಾಕಲಾಗಿತ್ತು. ಈ ಹೊಸ ಬೆಳವಣಿಗೆಗಳು ಆಡಳಿತಾರೂಢ ಸಿಪಿಐ(ಎಂ) ಪಕ್ಷದ ಮೇಲೆ ಇನ್ನಷ್ಟು ಒತ್ತಡವನ್ನು ಹೆಚ್ಚಿಸುವ ನಿರೀಕ್ಷೆಯಿದೆ.
