ಟೆಲ್ ಅವಿವ್, ಅ. 01 : ಆಕಾಶದಲ್ಲಿ 34 ಸಾವಿರ ಅಡಿ ಎತ್ತರ… ಕ್ಷಣಾರ್ಧದಲ್ಲಿ ವಿಮಾನ ಪತನಗೊಳಿಸಲು ಮುಂದಾದ ಸಹ-ಪೈಲಟ್… ರಕ್ತಸಿಕ್ತ ಕಾಕ್‌ಪಿಟ್‌ನಲ್ಲಿ ನಡೀತು ಭೀಕರ ಕಾಳಗ ! ಸಾವು ಕಣ್ಣೆದುರೇ ಕಂಡರೂ ಎದೆಗುಂದದ ಆ ಭಾರತೀಯ ಪೈಲಟ್‌ನ ಅದ್ಭುತ ಸಮಯಪ್ರಜ್ಞೆ, ಇಂದು 174 ಅಮಾಯಕ ಜೀವಗಳನ್ನು ರಕ್ಷಿಸಿದೆ. ದುಬೈ-ಟೆಲ್ ಅವಿವ್ ವಿಮಾನದಲ್ಲಿ ಸಂಭವಿಸಬೇಕಿದ್ದ ಭೀಕರ ‘9/11’ ಮಾದರಿಯ ದುರಂತವನ್ನು ಒಬ್ಬ ಭಾರತೀಯ ಕ್ಯಾಪ್ಟನ್ ತನ್ನ ಉಸಿರು ಬಿಗಿಹಿಡಿದು ಹಿಮ್ಮೆಟ್ಟಿಸಿದ ಕಥೆಯಿದು.
ಹೌದು. ದುಬೈನಿಂದ(Dubai) ಇಸ್ರೇಲ್‌ನ ಟೆಲ್ ಅವಿವ್‌ಗೆ ಹೊರಟಿದ್ದ ಫ್ಲೈದುಬೈ (Fly Dubai) ವಿಮಾನದ ಕಾಕ್‌ಪಿಟ್‌ನಲ್ಲಿ ಸಹ-ಪೈಲಟ್‌ನಿಂದ ಮಾರಣಾಂತಿಕ ಹಲ್ಲೆಗೊಳಗಾದರೂ ಧೃತಿಗೆಡದೆ ವಿಮಾನದ ನಿಯಂತ್ರಣ ಸಾಧಿಸಿ 174 ಪ್ರಯಾಣಿಕರ ಜೀವ ಉಳಿಸಿದ ಮುಖ್ಯ ಪೈಲಟ್ ಭಾರತೀಯ ಪ್ರಜೆ ಎಂದು ಗುರುತಿಸಲಾಗಿದೆ.
ಭಾರತದ ಮಾಜಿ ಸ್ಪೈಸ್‌ಜೆಟ್ ಪೈಲಟ್ ಆಗಿದ್ದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ (Smit Machchhar) ಅವರೇ ಸಹ ಪೈಲಟ್‌ನೊಂದಿಗೆ ಜೀವದ ಹಂಗು ತೊರೆದು ಹೋರಾಡಿ ಸಾಹಸ ಮೆರೆದ ಭಾರತೀಯ ಪೈಲಟ್ ಎಂದು ಇಸ್ರೇಲ್‌(Israel) ಮಾಧ್ಯಮಗಳು ವರದಿ ಮಾಡಿವೆ.
