ನವದೆಹಲಿ : 23ನೇ ವಾರ್ಷಿಕ ಶೃಂಗಸಭೆಗಾಗಿ ಡಿಸೆಂಬರ್ 4 ಮತ್ತು 5 ರಂದು ರಷ್ಯಾ ಅಧ್ಯಕ್ಷ ವ್ಯಾದಿಮಿರ್ ಪುತಿನ್ ಅವರು ಭಾರತಕ್ಕೆ ಆಗಮಿಸುತ್ತಿದ್ದಾರೆ. ಈ ಭೇಟಿ ರಷ್ಯಾ-ಉಕ್ರೇನ್ ಯುದ್ಧ ಆರಂಭ ಮತ್ತು ಭಾರತದ ಅಪರೇಷನ್ ಸಿಂಧೂರ ನಂತರದ ಮೊದಲ ಭೇಟಿಯಾಗಿದೆ. ವಿಶೇಷವಾಗಿ ಸಂಭಾವ್ಯ ಹೊಸ 5-400 ವಾಯು ರಕ್ಷಣಾ ವ್ಯವಸ್ಥೆಯ ಒಪ್ಪಂದ, ರಕ್ಷಣಾ ಸಹಕಾರದ ವಿಚಾರದಲ್ಲಿ ಎರಡೂ ದೇಶಗಳ ನಡುವಿನ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಪುನರುಚ್ಚರಿಸುವುದು ಪ್ರಧಾನಿ ನರೇಂದ್ರ ಮೋದಿ ಮತ್ತು ಪುತಿನ್ ನಡುವಿನ ಚರ್ಚೆಯ ಮುಖ್ಯ ವಿಚಾರ ಎಂದು ನಿರೀಕ್ಷಿಸಲಾಗಿದೆ.
ಶೃಂಗಸಭೆಯ ಸಮಯದಲ್ಲಿ ಹಲವಾರು ರಕ್ಷಣಾ ಯೋಜನೆಗಳಲ್ಲಿ ನವೀಕೃತ ಸಹಯೋಗವನ್ನು ಅನ್ವೇಷಿಸುವ ನಿರೀಕ್ಷೆಯಿದ್ದು, ಇದರಲ್ಲಿ ಭಾರತೀಯ ವಾಯುಪಡೆಗೆ ಎರಡರಿಂದ ಮೂರು ಹೆಚ್ಚುವರಿ 5-400 ರೆಜಿಮೆಂಟ್ಗಳನ್ನು ಪೂರೈಸುವ ರಷ್ಯಾದ ಪ್ರಸ್ತಾಪವೂ ಸೇರಿದೆ. ಕಳೆದ ದಶಕದಲ್ಲಿ ರಷ್ಯಾದ ಶಸ್ತ್ರಾಸ್ತ್ರ ಆಮದಿನ ಪಾಲು ತೀವ್ರವಾಗಿ ಕುಸಿದಿದ್ದರೂ, ಭಾರತದ ಶೇ. 60-70ರಷ್ಟು ಶಸ್ತ್ರಾಗಾರ ರಷ್ಯಾದಿಂದಲೇ ಬರುತ್ತಿರುವುದರಿಂದ, ರಷ್ಯಾದ ಮಿಲಿಟರಿ ಉಪಕರಣಗಳ ಮೇಲಿನ ಅವಲಂಬನೆ ಹೆಚ್ಚಾಗಿರುವುದನ್ನು ಗಮನಿಸಬಹುದು. ಎರಡು ರಾಷ್ಟ್ರಗಳ ಮಿಲಿಟರಿಗಳ ನಡುವಿನ ಐತಿಹಾಸಿಕ ನಂಬಿಕೆ ಮತ್ತು ಪರಸ್ಪರ ಕಾರ್ಯಸಾಧ್ಯತೆಯು ಭಾರತದ ರಕ್ಷಣಾ ಸನ್ನದ್ಧತೆಯನ್ನು ರೂಪಿಸುವಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತಿದೆ. ಆತ್ಮನಿರ್ಭರ ಭಾರತ ಉಪಕ್ರಮದ ಬಳಿಕ SIPRI ಪ್ರಕಾರ, ಭಾರತದ ಶಸ್ತ್ರಾಸ್ತ್ರ ಆಮದುಗಳಲ್ಲಿ ಶೇ. 76 ರಷ್ಟು 2009 ರಲ್ಲಿ ರಷ್ಯಾದಿಂದ ಆಗುತ್ತಿತ್ತು, ಆದರೆ ಈ ಅಂಕಿ ಅಂಶವು 2024 ರಲ್ಲಿ ಶೇ. 36 ಕ್ಕೆ ಇಳಿದಿದೆ. ಆದಾಗ್ಯೂ ರಷ್ಯಾದೊಂದಿಗೆ 5-400, ಬ್ರಹ್ಮಸ್ ಕ್ರೂಸ್ ಕ್ಷಿಪಣಿ ಮತ್ತು T-90 ಟ್ಯಾಂಕ್ಗಳಂತಹ ಜಂಟಿ ಯೋಜನೆಗಳನ್ನು ಭಾರತ ಇನ್ನೂ ಮುಂದುವರಿಸಿದೆ.
ಭಾರತ ಮತ್ತು ರಷ್ಯಾ ನೌಕಾಪಡೆಗಾಗಿ ಮಿಗ್ -29 ಯುದ್ಧ ವಿಮಾನಗಳು, ಕಾಮೋವ್ ಹೆಲಿಕಾಪ್ಟರ್ಗಳು, ಟಿ -72 ಟ್ಯಾಂಕ್ಗಳು, ಬಿಎಂಪಿ 2 ಶಸ್ತ್ರಸಜ್ಜಿತ ವಾಹನಗಳು ಮತ್ತು ಸ್ಟೈಲ್ತ್ ಫ್ರಿಗೇಟ್ಗಳ ಉತ್ಪಾದನೆಯಲ್ಲಿ ಪರಸ್ಪರ ಸಹಕರಿಸುತ್ತಿವೆ. ‘ಅಪರೇಷನ್ ಸಿಂದೂರ್’ ವೇಳೆ ಭಾರತದಲ್ಲಿ “ಸುದರ್ಶನ ಚಕ್ರ” ಎಂದು ಕರೆಯಲ್ಪಡುವ 5-400 ನ ಕಾರ್ಯಾಚರಣೆ ಭಾರೀ ಯಶಸ್ಸನ್ನು ಎತ್ತಿ ತೋರಿಸಿತು. ರಷ್ಯಾದಿಂದ ಭಾರತ ಇನ್ನೂ ಐದು 5-400 ವಾಯು ರಕ್ಷಣಾ ಸ್ಮಾಡ್ರನ್ಗಳನ್ನು ಬಯಸುತ್ತಿದೆ. ಭಾರತದ ರುಪೇ ಮತ್ತು ರಷ್ಯಾದ ಮಿರ್ ಪಾವತಿ ಜಾಲಗಳನ್ನು ಸಂಪರ್ಕಿಸುವ ಮತ್ತು ರೂಪಾಯಿ-ರೂಬಲ್ ವ್ಯವಸ್ಥೆಗಳು ಉತ್ತಮವಾಗಿ ಕಾರ್ಯನಿರ್ವಹಿಸುವಂತೆ ಮಾಡುವ ಯೋಜನೆ ಮಾಡಲಾಗಿದ್ದು, ಇದರಿಂದಾಗಿ ರಷ್ಯಾದ ಮೇಲೆ ಪಾಶ್ಚಿಮಾತ್ಯ ನಿರ್ಬಂಧಗಳು ಬಿಗಿಯಾಗುತ್ತಿದ್ದರೂ ವ್ಯಾಪಾರ ಮುಂದುವರಿಸಬಹುದು ಎಂಬ ಲೆಕ್ಕಾಚಾರವಿದೆ.
