ವಾಷಿಂಗ್ಟನ್, ಆ. 18 : ಭಾರತ ತನ್ನ ಚುನಾವಣಾ ಪದ್ದತಿ ಹಾಗೂ ಇದಕ್ಕೆ ಸಂಬಂಧಿಸಿದ ತಂತ್ರಜ್ಞಾನದಲ್ಲಿ ಪಾಶ್ಚಿಮಾತ್ಯ ಹಾಗೂ ಇತರೆ ಮುಂದುವರಿದಿರುವ ರಾಷ್ಟ್ರಗಳಿಗಿಂತಲೂ ಬಹಳಷ್ಟು ಮುಂಚೂಣಿಯಲ್ಲಿದೆ. ಸದ್ಯ ಇದಕ್ಕೆ ನಿದರ್ಶನವೆಂಬಂತೆ ಇದೀಗ ವಿಶ್ವದಲ್ಲೇ ಅತಿಹೆಚ್ಚು ಮುಂದುವರೆದ ರಾಷ್ಟ್ರವೆಂದು ಪರಿಗಣಿಸಲ್ಪಡುವ ಅಮೆರಿಕಾ ಸಹ ನಮ್ಮ ಚುನಾವಣಾ ಪದ್ದತಿಯತ್ತ ಒಲವು ತೋರಿದ್ದು, ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ದೇಶದಲ್ಲಿ ನಡೆಯುವ ಚುನಾವಣೆಯಲ್ಲಿ ಭಾರತದಂತೆ ವೋಟರ್ ಐಡಿ ವ್ಯವಸ್ಥೆ ಜಾರಿಗೆ ತರಲು ಮುಂದಾಗಿದ್ದಾರೆ.
ಈ ಕುರಿತು ಭಾರತದ ಚುನಾವಣಾ ಆಯೋಗದ ಮುಖ್ಯಸ್ಥರಾಗಿರುವ ಜ್ಞಾನೇಶ್ ಕುಮಾರ್ ಅವರನ್ನು ಉಲ್ಲೇಖಿಸಿ ಭಾರತದ ಚುನಾವಣಾ ವ್ಯವಸ್ಥೆಯನ್ನು ಉದಾಹರಣೆಯಾಗಿ ನೀಡುತ್ತಾ ಅಮೆರಿಕಾದಲ್ಲೂ ಇಂತಹ ವೋಟರ್ ಐಡಿ ವ್ಯವಸ್ಥೆ ಬರಬೇಕು ಎಂದು US ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ಇಂಗಿತವನ್ನು ಹೊರಹಾಕಿದ್ದಾರೆ. ಈ ಕುರಿತು ತಮ್ಮ ಅಧಿಕೃತ ಟ್ರೂತ್ ಸೋಶಿಯಲ್ ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಡೊನಾಲ್ಡ್ ಟ್ರಂಪ್ “ಈ ತಿಂಗಳ ಆರಂಭದಲ್ಲಿ, ಭಾರತದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ನಮ್ಮ ಆಡಳಿತವನ್ನು “ಮಾನ್ಯ ಫೋಟೋ ಐಡಿ ಇಲ್ಲದೆ ನೀವು ಅಮೆರಿಕಾದಲ್ಲಿ ಚುನಾವಣೆಗಳನ್ನು ಹೇಗೆ ನಡೆಸುತ್ತೀರಿ?” ಎಂದು ಕೇಳಿದ್ದಾರೆ ಎಂದು ಹೇಳಿಕೊಂಡಿದ್ದಾರೆ.
ಭಾರತದ ಚುನಾವಣಾ ವ್ಯವಸ್ಥೆ ಕುರಿತು ಉಲ್ಲೇಖಿಸುತ್ತಾ “ಭಾರತದಲ್ಲಿ ಇತ್ತೀಚೆಗೆ ನಡೆದ ಚುನಾವಣೆಯಲ್ಲಿ ಬರೋಬ್ಬರಿ 646 ಮಿಲಿಯನ್ ಮತದಾರರಿದ್ದರು. ಇದರಲ್ಲಿ ಕೇವಲ ಶೇ.1ಕ್ಕಿಂತ ಕಡಿಮೆ ಪ್ರಮಾಣದ ಮತದಾರರು ಮೇಲ್/ಅಂಚೆಯ ಮೂಲಕ ಮತ ಚಲಾಯಿಸಿದ್ದಾರೆ. ಅಲ್ಲದೆ, ಈ ಚುನಾವಣೆಯಲ್ಲಿ ಪಾಲ್ಗೊಳ್ಳಲು ಪ್ರತಿಯೊಬ್ಬ ಮತದಾರರು ತಮ್ಮ ಮಾನ್ಯ ಫೋಟೋ ಗುರುತಿನ ದಾಖಲೆಯನ್ನು ಹೊಂದಿರಬೇಕಾಗಿದೆ” ಎಂದು ತಿಳಿಸಿದ್ದಾರೆ. ಅಲ್ಲದೆ, ಭಾರತದಂತೆ ಅಮೆರಿಕಾದಲ್ಲೂ ಇಂತಹ ವ್ಯವಸ್ಥೆಅಳವಡಿಸಿಕೊಳ್ಳುವ ಅಗತ್ಯವಿದೆ ಎಂದಿದ್ದು,” ನಾವು ಈಗ SAVE ಅಮೆರಿಕಾ ಕಾಯ್ದೆಯನ್ನು ಅಂಗೀಕರಿಸಬೇಕಾಗಿದೆ” ಎಂದು ತಿಳಿಸಿದ್ದಾರೆ.
ಏನಿದು SAVE ಅಮೆರಿಕಾ ಕಾಯ್ದೆ?
SAVE ಅಮೆರಿಕಾ ಕಾಯ್ದೆ ಎಂದರೆ ಸೇಫ್ಗಾರ್ಡ್ ಅಮೇರಿಕನ್ ವೋಟರ್ ಎಲಿಜಿಬಿಲಿಟಿ (Safeguard American Voter Eligibility) ಕಾಯ್ದೆಯು ಅಮೆರಿಕಾದಲ್ಲಿ ನಡೆಯುವ ಫೆಡರಲ್ ಎಲೆಕ್ಷನ್ಗಳಲ್ಲಿ ಮತದಾನಕ್ಕೆ ಕಠಿಣ ಅವಶ್ಯಕತೆಗಳನ್ನು ಪರಿಚಯಿಸುವ ಗುರಿಯನ್ನು ಹೊಂದಿದೆ. ಈ ಪ್ರಸ್ತಾವಿತ ಕಾನೂನು ಫೆಡರಲ್ ಚುನಾವಣೆಗಳಿಗೆ ನೋಂದಾಯಿಸಿಕೊಳ್ಳುವ ಮತದಾರರು ಅಮೆರಿಕಾದ ಪೌರತ್ವದ ದಾಖಲೆ ಪುರಾವೆ ಮತ್ತು ಸರ್ಕಾರ ನೀಡಿದ ಮಾನ್ಯ ಫೋಟೋ ಗುರುತಿನ ಚೀಟಿ/ವೋಟರ್ ಐಡಿಯನ್ನು ಒದಗಿಸುವುದನ್ನು ಕಡ್ಡಾಯಗೊಳಿಸುತ್ತದೆ.
ಈ ವರ್ಷದ ಜನವರಿ 29 ರಂದು ಟ್ರಂಪ್ ಆಡಳಿತ US ಕಾಂಗ್ರೆಸ್ನಲ್ಲಿ ಪರಿಚಯಿಸಲಾದ SAVE ಅಮೆರಿಕಾ ಕಾಯ್ದೆಯು ಭಾರತದ ಚುನಾವಣಾ ವ್ಯವಸ್ಥೆಯ ಅಂಶಗಳೊಂದಿಗೆ ಹೋಲಿಸಿರುವ ಹಲವಾರು ನಿಬಂಧನೆಗಳನ್ನು ಒಳಗೊಂಡಿದ್ದು, ಇದರಲ್ಲಿ ಫೆಡರಲ್ ಎಲೆಕ್ಷನ್ನಲ್ಲಿ ಪಾಲ್ಗೊಳ್ಳುವ ಮತದಾರರ ನೋಂದಣಿಗೆ ಪೌರತ್ವದ ಸಾಕ್ಷ್ಯಚಿತ್ರ ಪುರಾವೆ ಅಗತ್ಯವಿದೆ, ಮತದಾನ ಕೇಂದ್ರಗಳಲ್ಲಿ ಫೋಟೋ ಗುರುತಿನ ಚೀಟಿಯನ್ನು ಕಡ್ಡಾಯಗೊಳಿಸುವುದು ಮತ್ತು ಗೈರುಹಾಜರಿ ಮತದಾನದ ಮೇಲೆ ಬಿಗಿಯಾದ ಮಿತಿಗಳನ್ನು ಹೇರುವುದು ಅಗತ್ಯವಿದೆ ಎಂಬ ಅಂಶಗಳ ಉಲ್ಲೇಖವಾಗಿದೆ.
ಅಲ್ಲದೆ, ಪ್ರಸ್ತಾವಿತ ಕಾಯ್ದೆಯ ಅಡಿಯಲ್ಲಿ, ಗೈರುಹಾಜರಿ ಮತದಾನವು ಸಾಮಾನ್ಯವಾಗಿ ಅನಾರೋಗ್ಯ, ಅಂಗವೈಕಲ್ಯ, ಮಿಲಿಟರಿ ಸೇವೆ ಅಥವಾ ಪ್ರಯಾಣ ಸೇರಿದಂತೆ ನಿರ್ದಿಷ್ಟ ಸಂದರ್ಭಗಳಿಗೆ ಸೀಮಿತವಾಗಿರುತ್ತದೆ. ಫೆಡರಲ್ ಮತದಾರರ ಪಟ್ಟಿಯಿಂದ ನಾಗರಿಕರಲ್ಲದವರನ್ನು ಗುರುತಿಸಲು ಮತ್ತು ತೆಗೆದುಹಾಕಲು ರಾಜ್ಯಗಳು ಕ್ರಮಗಳನ್ನು ತೆಗೆದುಕೊಳ್ಳಬೇಕೆಂದು ಮಸೂದೆಯು ಸಹಾಯ ಮಾಡಲಿದೆ ಎಂದು ಟ್ರಂಪ್ ಆಡಳಿತ ಪ್ರತಿಪಾದಿಸಿದೆ.
ಈ ವ್ಯವಸ್ಥೆಯನ್ನು ʼಸಾಮಾನ್ಯ ಜ್ಞಾನದ ಹೆಜ್ಜೆʼ ಎಂದು ಶ್ವೇತಭವನ ಬಣ್ಣಿಸಿದ್ದು, ಅಮೆರಿಕಾದ ಚುನಾವಣಾ ವ್ಯವಸ್ಥೆಯನ್ನು ಭಾರತ ಹಾಗೂ ಬ್ರೆಜಿಲ್ ದೇಶಗಳಿಗೆ ಹೋಲಿಸಿದೆ. “ಭಾರತ ಮತ್ತು ಬ್ರೆಜಿಲ್ ಮತದಾರರ ಗುರುತಿನ ಚೀಟಿಯನ್ನು ಬಯೋಮೆಟ್ರಿಕ್ ಡೇಟಾಬೇಸ್ಗೆ ಜೋಡಿಸುತ್ತವೆ, ಆದರೆ ಅಮೆರಿಕವು ಪೌರತ್ವಕ್ಕಾಗಿ ಸ್ವಯಂ ದೃಢೀಕರಣವನ್ನು ಹೆಚ್ಚಾಗಿ ಅವಲಂಬಿಸಿದೆ. ಹಾಗಾಗಿ ಅಮೆರಿಕಾ ಸಹ ಇಂತಹ ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳುವ ಮೂಲಕ ಅಮೆರಿಕಾದ ನಾಗರಿಕರು ಮಾತ್ರ ಅಮೆರಿಕನ್ ಚುನಾವಣೆಗಳನ್ನು ನಿರ್ಧರಿಸಬೇಕು” ಎಂದು ವಾದಿಸಿದೆ. ಆದಾಗ್ಯೂ, US ಕಾಂಗ್ರೆಸ್ನಲ್ಲಿ ಈ ಕಾಯ್ದೆ ಅನುಮೋದನೆಗೆ ಡೆಮಕ್ರಾಟಿಕ್ ಪಕ್ಷದಿಂದ ಅಡೆತಡೆಗಳು ಎದುರಾಗುತ್ತಿದ್ದು, ಇದಕ್ಕೆ ವಿರೋಧ ವ್ಯಕ್ತವಾಗುತ್ತಿದೆ.
